Torturaren inguruko adierazpen bat aho batez onartu dute gaur Nafarroako Parlamentuko Mahaiak eta Bozeramaileen Batzordeak

Ekainaren 26an "Torturaren biktimei babesteko Nazioarteko Eguna" ospatzearekin bat egiten duen adierazpena aho batez onartu dute gaur Nafarroako Parlamentuko Mahaiak eta Bozeramaileen Batzordeak, Unai Uhalde presidentearen ekimenez.

Adierazpenak gogora ekarri duenez, "egun hau oraindik ez da ospatu Legebiltzarrean”, eta helburua “biktima horiek gizartearen aurrean aitortzea da, giza eskubideen urraketa larri honek suposatzen duen bidegabekeriagatik".

Nafarroako Foro Sozial Iraunkorrak oso positiboki baloratu nahi du adierazpen hau onartu izana. Urrats sinboliko garrantzitsua da Estatuak Nafarroan eragindako indarkeriak utzi dituen biktimei errekonozimendua eta erreparazioa emateko bide zailean.

2021 urte honetan aurrerapausoak ematen ari dira arlo horretan. Martxoaren 1ean, Parlamentuak aho batez onartu zuen Mikel Zabalzaren kasua ikertzeko ebazpena; martxoaren 12an, Nafarroako Parlamentuko presidenteak Zabalza familia aitortzeko ekitaldia egin zuen, eta maiatzaren 18an TC-k Estatuaren Biktimak Aitortzeko 16/2019 Foru Legea babestu zuen, eta datozen hilabeteetan jarriko da abian. Lege horri esker, aitorpen instituzional sinbolikotik erreparazio instituzional errealera pasatu ahal izango da.

Foro Sozial Iraunkorraren lana gidatzen duen printzipioa argia da: biktima guztiek egiarako, justiziarako eta erreparaziorako eskubidea dute, eta oraindik dauden diskriminazio-egoerak gainditu behar dira.

Hori dela eta, uste dugu urrats horiek mugarri bat izan direla. Urrats horiei esker, hainbat hamarkadatan Estatuaren biktimen sufrimendua areagotzen eta babesgabetasunean sakontzen zuten susmoekin amaituko dela.

Nafarroan torturari buruz egin beharreko ikerlanaren zain, datuek erakusten dute "noizbehinkako" praktika baino gehiago izan dela. Euskal Memoria Fundazioak 800 tortura-kasu baino gehiago identifikatu ditu Nafarroan.

Bestalde, gogoratu nahi dugu Eusko Legebiltzarrak antzeko ebazpen bat hartu zuela 2019ko ekainaren 20an, eta, kasu hartan, ELA, LAB, CCOO, UGT, ESK, Steilas, Hiru, EHNE, Etxalde, CNT eta CGT sindikatuek aho batez babestu zutela.

Amaitzeko, berriro esan nahi dugu gai hau sakonki eta konponbide klabean jorratzen ez den bitartean, gure gizartearentzat gainditu gabeko gaia izaten jarraituko duela. Beraz, bada garaia behin betiko konponbidea emateko behar diren mekanismoak jartzeko.